Hikûmeta Brîtanyayê ji bo parastina ewlehiya zarokan a di cîhana dîjîtal de gaveke radikal avêt û ragihand ku ew ê bikaranîna medyaya civakî ji bo zarokên di bin 16 saliyê de bi tevahî qedexe bike. Li gorî daxuyaniya Serokwezîr Keir Starmer, ev biryar dê di serê sala 2027'an de (dema biharê) bikeve meriyetê û platformên navdar ên mîna Snapchat, TikTok YouTube, Instagram, Facebook û X (Twitter) bihewîne. Starmer diyar kir ku wekî bavekî gihştiye vê biryarê û parastina zarokan ji medyaya civakî ji bo welatê wî gava herî rast e. Serokwezîr destnîşan kir ku daxwaza wî ya ji kûr ve ji bo zarokên xwe û daxwaza her dê û bavekî ew e ku zarokên wan di nav ewlehî û şahiyê de mezin bibin.
Sedema sereke ku hikûmetan neçar dike biryarên bi vê rengî yên tund bistînin, bandorên neyînî û xirab ên medyaya civakî ne ku li ser derûniya zarokan çêdikin. Lêkolîn û raporên pisporan nîşan didin ku bikaranîna zêde ya medyaya civakî di nav ciwanan de dibe sedema zordariya sîber (cyberbullying), tacîza serhêl, pirsgirêkên x x x xwarina xewê, û fikarên derbarê rûxsarê laş de. Her wiha algorîtmayên ku mirov pê ve girêdidin—mîna taybetmendiya "herikîna bêdawî" (infinite scrolling)—anfetiya giran û depresyonê di nav xortan de geş dike. Hikûmet dixwazin desthilatdariya fîrmayên teknolojiyê ya li ser zarokan kêm bikin û mafê zaroktiyê dîsa bidin destê wan.
Brîtanya ne welatê yekem e ku vê biryarê distîne; berovajî vê, ew li pey şepoleke cîhanî ya mezin diçe. Di cîhanê de welatê yekem ê ku ev qedexeya tam da destpêkirin Awusturalya bû, ku di Kanûna 2025'an de medyaya civakî ji bo kesên di bin 16 saliyê de qedexe kir. Piştî wê, di serê sala 2026'an de Endonezya û Malezyayê jî ji bo bin 16 saliyê qedexeyên mîna yên Awusturalyayê anîn. Li parzemîna Ewropayê jî welatên wekî Fransa, Îspanya, Danîmarka, Yûnanistan, Slovenya û Polonyayê qanûnên nû amade kirine an jî pejirandine ku temenê sînor wekî 15 an 16 destnîşan dikin û pergalên piştrastkirina temenê dixwazin. Çîn jî bi riya pergalên moda biçûkan" (minor mode) li ser amûran sînorên demê û qedexeya şevê bi awayekî qanûnî bi kar tîne.
Rojname
