Heyeta Îmralî ya Partiya DEMê ku ji Pervîn Buldan, Mithat Sancar û Faîk Ozgur Erol pêk tê, êvara Çarşemê derengî şevê li Meclîsê (TBMM) bi Cîgirê Serokê Giştî yê AKPê Efkan Ala û Serokê Koma AKPê Abdullah Guler re civiya. Heyetê her wiha îro jî Serokê Giştî yê MHPê Devlet Bahçelî di meqamê wî yê li Meclîsê de ziyaret kir.
Hûrgiliyên Civîna bi AKPê re
Di hevdîtina li Meclîsê de ji aliyê AKPê ve Efkan Ala û Abdullah Guler amade bûn. Ji aliyê heyeta DEM Partiyê ve jî Cîgira Seroka Meclîsê Pervîn Buldan, Parlamenterê Rihayê Mithat Sancar û parêzerê Abdullah Ocalan, Faîk Ozgur Erol beşdarî civînê bûn. Hat ragihandin ku civîna ku duh êvarê saet di 20:30an de dest pê kir, 1.5 saet berdewam kir.
Rojeva Civînê: Pêşnûmeya Qanûna Çarçoveyê
Rojeva sereke ya vê hevdîtinê li ser pêvajoya "Tirkiyeya bêteror" û pêşnûmeya qanûna çarçoveyê bû. Di civînê de nûnerên AKPê derbarê hûrgiliyên vê pêşnûmeyê de agahî dan heyeta DEM Partiyê. Heyetê jî daxwaz û pêşniyarên Ocalan û partiyê yên ji bo cîhgirtina di nav vê pêşnûmeyê de pêşkêşî aliyê din kirin. Di heman demê de, Heyeta Îmralî careke din destnîşan kir ku daxwaza wan ew e ku ev qanûna çarçoveyê ya ku dê binesaziya hiqûqî ya pêvajoyê ava bike, herî dereng di meha Tîrmehê de li Meclîsê bê qebûlkirin û bibe qanûn.
Rojname